Schröder Show Sextett - die Showband aus Franken

23.07.2009

Schlachtschüssel 2009

Erfolgreich bestanden wir die Schlachtschüssel 2009.

Prima Sache!

21.07.2009

Die Schlachtschüssel und ihre Spätfolgen.

Dradizionell beginnd des Annafesd - na, ned am Samsdooch - sondern am Donnersdooch zuvor. Für uns alde Forchheimer. Mid der Schlachdschüssl. Middlerweiln in unsern Kreisn aa "Kryptobierschüssel" genannd. Du nimmsdda für den Dooch egsdra amol frei .... fürn negsdn besser aa. Denn es is ja alles sooo fedd! So geechn elfa (in der Früh) marschiersd mid die besdn Absichdn nauf die Keller. "Ab zwölfa is reservierd"! Do kummans dann alle - dei Froind. Naja! Bissi dann alle eidrudln werds aanz. Unhöflich willsd ja aa ned sei ... nochad wards hald mid deiner Beschdellung ... und dringsd scho amol aans (oder aa zwaa). A Schlachdschüssl is für den, ders moog, der frängische Himml auf Erdn! Kesslfleisch, Blud- und Leberwörschd, Sauerkraud, Bfeffer und Salz und a guds Brod! Was willsdn mehr?! Bissi dann alle doo sin und wos beschdelld ham, hosd scho dei dridde Halbe. Und des auf nüchdernen Moong. Noochm Essn braugsd erschd amol a Schnäbbsla. Mei! Wor des fedd! Und wallsd eh scho frei hosd, nochad gehsd aa ned glei ham. Was solli denn do?! Dahaam schderm die Leud! Is ja nuch hell draussn, und der negsde Keller blos zwölf Schridd weider. Aanz gehd noch, drüm beim negsdn. Aber dann! Dann gemma hamm! Bfeiffndeggl! Is erschd viera! Kömma doch ned haam gehn. Die Fraa dengd ja, du hosd was ausgfressn, wennsd edz scho ookummsd. Also gud ... aber ehrlich blos nuch aanz - drüüm, beim negsdn Keller. Edz hom wir ja ned grood weenich Keller - auf unsere Keller. Mehra brauch ich edz - glaab ich - ned zu soong. Und weil des Bier middlerweiln aa aweng fedd werd, nochad dringsd hald noch a Schnäbbsla zwischndurch. Für die Gsundheid! Seggsa oomnds! Des Hirn schdehd scho längsd auf "Stand Bye". Der Moong obber is nuch agdief. Du bröucherdsd des zwor nimmer, aber am - "ehrlich! des is der lezde Keller, dann gemma haam"! - beschdellsd da hald nuch amol so a Schlachbladdn mid allem drum und dran. "An Willi bidde"! Edz werds draussn aa scho langsam dungl. Der Dooch bassd sich deim middlerweiln obdischn und geisdign Auffassungsvermöögn an. Wies weidergehd? Ich glaab, des könnder oich edza scho selber vorschdelln. Und desweeng nimmd ma sich fürn negsdn Dooch auf alle Fäll aa frei. Besser is besser. Aber aa wie schlechds uns am negsdn Dooch aa geen solld - aanz schdehd fesd: Die Schlachdschüssl is des besde am ganzn Annafesd überhaubd! Oier Caesar.