Aktuelles

09.07.2009

Alladooch Annafest-T-Shirt 2009

King Alladooch lies es sich nicht nehmen das neue Alladooch Annafest T-Shirt persönlich an Charlie Pichl zu übergeben. Sichtlich erfreut stellten sich beide dem Fotografen.

Annafest, Alladooch, Annafest

Wer noch kein T-Shirt hat:

Bestellungen unter Alladooch Annafest.de

06.07.2009

Der Sommer und das Schwimmbad.

Die Dooch wors ja wieder amol schö warm, und da hobbi ma dengd: höggsd dich nach der Arbeid auf dein Drahdesl und fährsd amol in die Frängische naus.
Zwischn Gasseldorf und Muggendorf - mehr soog ich edz ned, es soll ja geheim bleibn und die Zeidung hods ja eh scho nausgeblärrd, aufdass morgn scho Godd und die Weld kummd und aus is mid dera Ruh -, do is a Freibad, genau nach meim Geschmagg.
Heudzudooch bauns ja nur noch "Fun & Action Aqua Worlds" mit "Überschlagwasserrutsche, Whirl-Pool, Wellnesbereich, Kleinkindunterwasserkrabbelgruppe" und an Haufn mehra von dem Scheiss, den ka Sau brauchd.
Ned so in dem Bad.
Heudzudooch wersd meisdns scho von am 500 Gigabyte schdargn Superkassnaudomadn empfanga, der wos da mid seiner Blechschdimma sogd, wasd zu zohln hosd, wie die Demberadur draussn und drinna is und ob dem Nachbarn sei Daggl scho gassi wor und sei Häufla gmachd hod.
Ned so in dem Bad.
Des is für mich wie a Zeidreise.
Heudzudooch sonngs für an Urlaub:" Wir jetten in die Holidays". Des Bad is aber nuch aus aaner Zeid, wo ma brav und anschdändig mid Sack und Pack - den Kanarienvogl im Gepäck, midm Zuuch in die "Sommerfrische" gfohrn is. Und des gfälld ma.
Do sidzd noch a Mensch aus Fleisch und Blud im Kassnhäusla, grinsd dich oo (soweid wir Frangn zu am Grins imschdand sein könna. Des und die Froindlichkeid liegen uns ja ned so in die Gene), begrüßd dich beim Namen, du zohlsd und hernach werd noch a Schdüggla geblauderd bis da endlich der Schwaas runderläffd und du blos noch ins Wasser mögsd.
Und dann sigsdes scho - die Fun & Action-Kinder-Attraktionen. Alle auf aan Schlooch.
Zwaa blaue Blasdigwasserrudschn und a uralds Schbrungbredd wosd da jeds mool an Schbreisl nein Fuß sabbsd, dasser oom zum Zeanoogl wieder rausschaud. Und des wors dann scho fasd.
Beheizd werd des Beggn fei ned! Da muß die Sonna scho a boor Doch draufbelzn. Dann kann die Wasserdemberadur aber aa scho amol auf sadde 17 Grad (Plus!) naufschnelzn. Und desweeng legsd dich mid deiner Deggn am besdn glei in Hörweite vom Beggnrand noo, denn so ofd hörsd du des - aus der tiefsten Seele kommende - "Leck mich am Orsch - is des kalt!" in deim ganzn Leem nimmer. Wenn in dem Bad die Muggn und Fliegn ins Wasser falln, nochad ersaufns ja ned. Die erfriern! Do schnurrd da echd allse zam. Auf Microorganismengröße!
Und desweeng is des Freibad aa die fränkisch-biologische Alternative zu am Bräserwadiev ... am Gummi hald.
Zumindesd, wennsd a Mann bisd, kannsd für die nägsdn zwaa/drei Schdundn ajegliche Familienplanung vergessn. Mid am Eiswürfl in der Underhosn?! Mach a Ei drüber ..... wenns wieder aufgedaud is. A Aussnschdell von aaner Schwangerschafdsberadund wersd du da draussn im Leem ned findn.
Und drozdem ... oder grad, weils so is wis ebn is, is des für mich des allerschönsde Freibad. Ober ned weidersoong.
Oier Caesar,.

01.07.2009

Wir sind gerüstet.!

Die Crew hat die Anlage und das Equipment für die Tour fertig gemacht.

Wanderjahre einer Königin 2009.

Danke Männer!!

30.06.2009

Ich will die Mauer wieder ...

Ich will die Mauer wieder ham. Na! Ned die Deutsch/Deutsche. Die alde Schadaddmauer um Forchheim rum.
Die Dooch wor ja Aldschdaddfesd bei uns. Ned verkehrd. Bassd scho. Drei Dooch Remmidemmi mid Mussig auf gleich vier Bodesdla. Für an jedn wos dabei ... oder aa ned!
Ich geh auf alle Fäll am Sunndooch Omnd nuch amol nei und seech - die Schdross dörf ich edz ned nenna - auf dera Bühna dord a Kabelln aufbaun - den Namen dörf ich edzad aa ned nenna - die wos ich kenn.
Ich bin ja selber a alder Rocker und schbiel immer nuch in aaner Bänd, und desweeng binni edz ned grod DER Folgsmusigfän. Die Kabelln, von der ich edz red, schbild aber frängische Volksmusigg. Und des mid Degsdn ... da hauds dan Vogl naus. Und des gfälld ma. Die sin echd genial.
Ich högg mich alos noo und deng ma: des werd a schööna Omnd.
Bfeiffndeggl!
Nochm zweidn Lied kummd scho aaner daher, der woos wos zu soong hod ... waller hald aa die Mussig zohln dud, von der Musigg selber ober scheinbor nigs verschdehd. Er sochd: "Schbild amol "In München steht ein Hofbräuhaus" und so an Schmarrn. Bei uns in Forchheim! Die Kabelln hods aber ned glei gschbild und nochm driddn Liedla kummd der Grosskobferde wieder und sochd edz doch erlich:" Oier Musigg bassd ned dooher. Am besdn, ihr baggd edz wieder zam und gehds ham."
Hinder mir sidzd a Zammgsuffna und raunzd: "Die machn ja nur Bausn. Warum schbiln die denn nimmer? Schbiln sollns! Ich will wos hörn!"
Ich dreh mich um und soog nas, wossi grod ghörd hob. Von weechn, dassi -laud dem, der wos scheinbor wos zum Soong hod, ned herbassn, aufhörn solln und soweider. Er drauf:"Genau! Aufhörn sollns!"
Ka Ahnung - alswie der Großkobferde, abers Maul aufreissn!
Ich dreh mich wieder um, verschdeh die Weld nimmer und kann nur noch mein Kobf schüddln.
Wo simmer denn, Leud?! Simmer edz am End wirklich allesamd großkobferde, zammgwaachde Ignoranten?
Und desweeng soog ich: Ich will die alde Schdaddmauer um Forchheim wieder rum. Zuumachn, die ganze Schdodd. Aufdass kaa Fremder mehr reikummd und siichd, was wir für Debbn sin!
Oier Franken-Caesar.

27.06.2009

Schröder probt wieder!

Erste Vorbereitungen für die "Wanderjahre einer Königin Tour"!

Wir proben wieder. Ohne Marec - der kann sei Zeuch scho :-)